Reperi i njohur shqiptar, Noizy, ka qenë i ftuari i radhës në studion e gazetarit gjerman Aria Nejati, ku ka zhvilluar një nga intervistat më të hapura dhe personale të karrierës së tij.
Në një bisedë prej më shumë se 48 minutash, lideri i OTR ka folur për fëmijërinë dhe vitet e para si emigrant në Britaninë e Madhe, krijimin e grupit OTR, rrugëtimin në hip-hop, bashkëpunimet ndërkombëtare, si dhe projektet e reja muzikore e kinematografike.
Nga erdhi emri “Noizy” dhe si u krijua OTR?
Noizy tregoi se emri artistik i tij ka lindur në Londër, ku një mësues e quante “noisy”, për shkak të natyrës së tij energjike dhe jokonformiste. Në atë kohë, për shkak se nuk e njihte mirë gjuhën angleze, ai e shkroi fjalën me “Z”, duke krijuar emrin që do ta shoqëronte gjatë gjithë karrierës.
Ai foli gjithashtu për krijimin e OTR, që sipas tij nisi kur ishte vetëm 14-15 vjeç. Grupi u konceptua si një formë mbështetjeje dhe vetëmbrojtjeje për fëmijët emigrantë që përballeshin me racizëm dhe bullizëm në rrugët e Londrës.
“Icon International”, projekti i ri muzikor
Gjatë intervistës, Noizy konfirmoi se po punon për albumin e ri, “Icon International”, i cili pritet të sjellë bashkëpunime me artistë të njohur nga Gjermania, Italia dhe Greqia.
Reperi foli edhe për marrëdhëniet e tij me disa prej emrave të njohur të skenës gjermane, mes tyre Azet, Loredana dhe RAF Camora. Ai zbuloi se ka përfunduar një bashkëpunim të ri me Azet dhe Dardan, i cili pritet të publikohet së shpejti.
Noizy për Dua Lipën: “Madona e ditëve të sotme”
Një tjetër moment që tërhoqi vëmendje ishte vlerësimi i Noizyt për suksesin ndërkombëtar të Dua Lipës.
Ai e cilësoi këngëtaren shqiptare si “Madona e ditëve të sotme” dhe si një prej ambasadoreve më të mëdha të kulturës shqiptare në botë.
Në pjesën më personale të intervistës, Noizy foli edhe për familjen dhe prejardhjen e tij. Ai tregoi se është rritur me një baba mysliman dhe një nënë katolike, duke e marrë këtë si shembull të harmonisë fetare që, sipas tij, karakterizon shqiptarët.
“Ne nuk gjykojmë nga feja, ne besojmë te Zoti dhe te veprat e mira”, u shpreh ai.
Nga muzika drejt kinemasë me “Blood Money”
Në fund të intervistës, Noizy zbuloi një tjetër projekt të rëndësishëm në karrierën e tij: pjesëmarrjen në filmin gjermano-shqiptar “Blood Money”, ku luan përkrah aktorit të njohur gjerman Moritz Bleibtreu.
Reperi la të kuptohej se, me kalimin e viteve, mund t’i kushtojë gjithnjë e më shumë kohë aktrimit, ndërsa prania e tij në muzikë mund të reduktohet gradualisht.
Intervista e plotë me Aria Nejatin është publikuar në YouTube dhe ka tërhequr vëmendjen e fansave të Noizyt dhe të skenës shqiptare të hip-hop-it, duke u kthyer në një prej bisedave më të komentuara të fundit.
https://www.youtube.com/embed/JlHSX5-sXtk?showinfo=0
